Թղթային QR ուղետոմսերը չեն գործում․ այսօրվանից տրանսպորտում են հսկիչները
Միասնական տոմսային համակարգում օգոստոսի 1-ից չեն գործածվում թղթային QR տոմսերը։ Քաղաքացիներից ոմանք արդեն ձեռք են բերել տրանսպորտային քարտ կամ վճարում են իրենց բանկային քարտի միջոցով։ Գոհ են նոր ավտոբուսների թե պայմաններից և թե սպասարկումից։
Երևանի քաղաքապետի տեղակալ Սուրեն Գրիգորանը լրագրողների հետ զրույցում, հիմնավորելով թղթային QR տոմսերը այլևս չգործածելու որոշումը, ասաց, որ մեծ քանակով թղթի տպագրությունը, բնապահպանական տեսանկյունից, այդքան էլ ճիշտ չէ։ Միաժամանակ Գրիգորյանը հայտնեց, որ վերջին օրերի ընթացքում ավելացել է տրանսպորտային քարտ գնողների թիվը։
Գրիգորյանի խոսքով՝ այն քաղաքացիները, որոնք առաջ QR ուղետոմսեր էին ձեռք բերում թղթային տարբերակով, կարող են այլևս ձեռք բերել տրանսպորտային քարտ և, պարբերաբար լիցքավորելով, օգտվել տրանսպորտային ծառայություններից. «Հորդորում եմ քաղաքացիներին տոմսերը ձեռք բերել նախապես։ Քարտերը հնարավոր է լիցքավորել «ԹելՍել» դրամապանակի, տերմինալների, transport.yerevan.am կայքի միջոցով։ Այսինքն՝ տնից, առանց հերթ կանգնելու, ձեզ հարմար ժամանակ նախապես մուտք անելով քարտի համարը, լիցքավորել և օգտվել»,- նշեց նա։
Քաղաքապետի տեղակալն ավելացրեց, որ թղթային տոմսերի դուրսբերման ժամանակ ապահովվել է մի քանի այլընտրանք, որից քաղաքացիները կարող են օգտվել. «QR ուղետոմսերի երկրորդ այլընտրանքն այն է, որ Тelcell տերմինալով վճարում կատարելուն սովոր քաղաքացիները համակարգում գրանցում են իրենց հեռախոսահամարը՝ առանց անձի նույնականացման, և նույն հեռախոսահամարով ձեռք բերված տոմսերը 10 վայրկյանի կամ կես րոպեի ընթացքում հայտնվում են դրամապանակում»։
Միաժամանակ փոխքաղաքապետը նշեց, որ քաղաքապետարանը հակված չէ միանգամից կիրառել տուգանքներ, սակայն ավելացրեց, որ հսկիչները շրջելու են ավտոբուսներով, աշխատանքը լինելու է միջազգային նորմերին համապատասխան. «Նրանք զինված են համապատասխան սարքավորումներով, որոնց միջոցով հնարավորություն կունենան ստուգելու՝ քաղաքացին վճարե՞լ է, թե՞ ոչ։ Այստեղ գումարի հավաքագրման խնդիր չենք ուզում լուծել տուգանքների տեսքով։ Մենք ուզում ենք, որ քաղաքացիները վճարեն նախատեսված ուղեվարձը։ Առաջիկա օրերին այն մարդիկ, որոնք անտեղյակ են, կոշտ մոտեցում՝ տուգանելու տեսքով, չի լինի։ Պետք է հավաստիացած լինենք, որ մարդիկ չարամտորեն չեն դա իրականացնում, որի դրսևորումը շատ կա»։
Սուրեն Գրիգորյանը նաև նկատել է, որ շատ քաղաքացիներ չգիտեն, որ չի կարելի իրենց արտոնյալ կարգավիճակ ունեցող բարեկամի ուղետոմսից օգտվել, ուստի ևս մեկ անգամ հիշեցրեց, որ նման քայլ անելը ևս խախտում է համարվում և ևս տուգանք նախատեսում, ըստ արդեն վավերացված օրենքի նախագծի՝ 15.000 դրամի չափով։
#Թղթային #ուղետոմսերը #չեն #գործում #այսօրվանից #տրանսպորտում #են #հսկիչները