Սիրիացի եղբայրներ՝ 23-ամյա Մոհամեդը և 25-ամյա Մուհանադ Ալ Նաջարը, կանգնել են դատարանի առաջ՝ իրենց 18-ամյա քրոջ՝ Ռայանի սպանության գործով։ Աղջկա մարմինը հայտնաբերվել էր ճահճուտում՝ կապված ձեռքերով և ոտքերով, իսկ բերանը՝ փակված։ Այս մասին հայտնում է Daily Mail-ը:

Նիդեռլանդների դատախազությունը միջադեպը պաշտոնապես որակել է որպես «պատվի համար սպանություն»։

Քննությամբ պարզվել է, որ Ռայանը անհետ կորել է 2025 թվականի մայիսի 22-ին։ Նրա մարմինը հայտնաբերվել է վեց օր անց՝ Լելիստադ քաղաքի մոտ գտնվող ճահճուտում։ Փորձաքննության տվյալներով՝ աղջիկը մահից առաջ դիմադրություն է ցուցաբերել, իսկ նրա եղունգների տակ հայտնաբերվել է եղբայրների և հոր ԴՆԹ-ն։

Դատախազության վարկածով՝ Ռայանը սպանվել է այն պատճառով, որ ունեցել է ընկեր և վարել է այնպիսի կենսակերպ, որը ընտանիքը համարել է չափազանց «արևմտյան»՝ դա գնահատելով որպես «անարգանք»։

Իրավապահների տվյալներով՝ աղջկա հայրը փախել է Սիրիա, սակայն նախատեսվում է նրան դատել հեռակա կարգով։ Եղբայրները, իրենց հերթին, հերքում են մեղադրանքները՝ պնդելով, որ սպանությունը կատարել է հենց իրենց հայրը։