Երևանում վերջին օրերին «անմարդկային շոգ է», օդի ջերմաստիճանը տեղ–տեղ գերազանցում է +40-ը, սակայն, ջրանջատումները մշտական պրոբլեմ է երևանցիների համար ամռանը։ 

MediaHub-ը բազմաթիվ ահազանգեր է ստացել այս անգամ Զեյթուն վարչական շրջանից։ Բանն այն է, որ մի քանի օր է «Վեոլիա Ջուրը» Զեյթուն վարչական շրջանում  վթարային ջրանջատումներ է իրականացնում։ Օրինակ՝ այսօր վթարային ջրանջատումները պետք է լինեն ժամը 12:00-24:00-ն ընկած ժամանակահատվածում։

«Այս շոգին որերորդ օրն է նորմալ ջուր չունենք, այսօր էլ տեղեկացրեցին, որ վթարային ջրանջատում պետք է լինի, իսկ ե՞րբ տեղեկացրեցին։ «Վեոլիա Ջուր» ընկերությունն իր տելեգրամյան ալիքում ջրանջատումների մասով տեղեկացրել էր 11:26-ին, այսինքն 30 րոպե շուտ ջրանջատումից։ Սա այն դեպքում, որ մեր շենքում ժամը 24:00-ից հետո ջուր չի լինում, այսինքն ստացվում է, որ 12:00–ից մինչև մյուս օրվա առավոտ մենք ջուր չենք ունենա, այն էլ այս շոգին, ո՞նց ապրենք, ինչպե՞ս ջրից օգտվենք, է ջուր չունենք, որ մի հատ էլ օգտվենք»,– նշեց մեզ ահազանգած քաղաքացին։

MediaHub-ին «Վեոլիա Ջուր» ընկերությունից նշեցին, որ ջրանջատումների մասին իրենք տեղեկացնում են ժամանակին ավելի քան 60 մեդիա կայքերում, Ֆեյսբուքում, տելեգրամյան ալիքներում։ Իսկ Զեյթուն վարչական շրջանի մասով նշեցին, որ այս պահին աշխատանքներ են տարվում։

Մարիաննա Արամյան