Ադրբեջանն ու Հայաստանն օգոստոսի 8-ին վերջին քայլն են արել խաղաղություն հաստատելու ուղղությամբ։ ԱՄՆ կատարած այցի ընթացքում Fox News-ին տված հարցազրույցում այս մասին ասել է Ադրբեջանի նախագահ Իլհամ Ալիևը։

«Շատ դժվար կլինի ցանկացած երկրի համար, թե՛ մեր տարածաշրջանում, թե՛ դրանից դուրս, այսօրվա  նվաճման մասին վատ բան ասել։ Որովհետև այսօր, ըստ էության, մենք վերջին քայլն ենք արել խաղաղություն հաստատելու ուղղությամբ»,- ասել է Ալիևը։

Ինչպես ընդգծվում է հոդվածում, Ադրբեջանի նախագահը հայտարարել է, որ «Թրամփի ուղու» (TRIPP) վերաբերյալ ձեռք բերված համաձայնագիրn ուղղված չէ որևէ մեկի դեմ։ Նա նշել է, որ սա նոր տրանսպորտային կապի նախագիծ է, որը կդառնա միջազգային տրանսպորտային ուղիների կարևոր բաղադրիչներից մեկը։

Հարցազրույցում Իլհամ Ալիևը նաև շնորհակալություն է հայտնել ԱՄՆ նախագահ Դոնալդ Թրամփին և նրա թիմին համաձայնագրի կնքման գործում ունեցած դերի համար։

Հավելենք, որ հարցազրույցներն արվել են օգոստոսի 9-ին, բայց հրապարակվել են օգոստոսի 14-ին։

Ամերիկյան Fox News-ն առաջինը Հայաստանի վարչապետի հարցազրույցից է մի հատված հրապարակել՝ վիդեոտարբերակով։ Այնուհետև ժամեր անց հրապարակել է առանձին հոդված, որում անդրադարձ է արվում ոչ միայն Վաշինգտոնի հանդիպմանը, այլ նաև Հայաստանի ներքաղաքական կյանքին, որում մի քանի կարճ պարբերություն էլ հատկացվել է Ալիևի հարցազրույցին՝ առանց վիդոտարբերակի։