«Հանուն Հանրապետության» կուսակցության առաջնորդ Արման Բաբաջանյանը, «Հայկական ժամանակ»-ի հետ հարցազրույցում անդրադառնալով ԱՄՆ-ում սպասվող Փաշինյան-Թրամփ-Ալիև հանդիպմանը, նախ ընդգծում է այն, որ 2022 թվականից ԱՄՆ-ն չեզոքությունից դուրս է եկել և սկսել ուղիղ ներգրավվել ՀՀ-Ադրբեջան հարաբերությունների կարգավորման գործընթացում:

Վերջինս նկատում է, որ սրանով ԱՄՆ-ն կանխել է Ադրբեջանի հարձակումը ՀՀ տարածքների վրա՝ միաժամանակ հիշեցնելով, որ այդ ժամանակ ՌԴ-ից, ՀԱՊԿ-ից ՀՀ-ն արձագանք չստացավ, և ռուսներին վերապահված դիրքերը անցան Ադրբեջանին:

Քաղաքական ուժի առաջնորդի նկատառմամբ՝ այս կարճ ժամանակահատվածում հայ-ամերիկյան երեք զորավարժություն և մի շարք բարձրաստիճան պաշտոնյաների հանդիպումներ են տեղի ունեցել։

Զրուցակիցը շեշտում է՝ Միացյալ Նահանգները ճանաչել է ՀՀ տարածքային ամբողջականությունը, ինքնիշխանությունը, անկախությունը: Այս համատեքստում Բաբաջանյանը նկատում է՝ ճանապարհների գործարկման հետ կապված ցանկացած առաջարկի դեպքում ԱՄՆ-ն ճանաչում է ՀՀ սուվերենությունը:

Արման Բաբաջանյանի խոսքով՝ ԱՄՆ-ն տարածաշրջանում ոչ միայն քաղաքական շահառու է, այլ նաև տնտեսական:

Կրկին անդրադառնալով սպասվող եռակողմ հանդիպմանը՝ «Հանուն Հանրապետության» կուսակցության նախագահն ասում է՝ կարևոր է, որ այս հանդիպման ժամանակ ձեռք բերվի համաձայնություն, և դրա տակ դրվի երկու երկրների (ՀՀ-Ադրբեջան) առաջնորդների ստորագրությունը, որը, ըստ նրա, անշրջելի կդարձնի խաղաղությունը տարածաշրջանում:

«Եռակողմ հայտարարությունը խաղաղություն չի բերել, քանի որ միջնորդը եղել է ՌԴ-ն, որն էլ սանձազերծել է պատերազմը՝ ճանապարհի նկատմամբ վերահսկողություն ունենալու համար, որ իր բեռները հասցնի Թուրքիա, ապա՝ Եվրոպա: Սա փակում է Նոյեմբերի 9-ի էջը և դրա հետ կապված զառանցանքները: Պայմանավորվածություն է լինելու գործողությունների պլան մշակելու մասին»,- նկատում է նա:

Բաբաջանյանը համոզմունք ունի, որ այս գործընթացի արդյունքում Միացյալ Նահանգները նաև ուզում է հասնել հայ-թուրքական սահմանի բացմանը. «Մոտ ապագայում լրջագույն զարգացումների ականատես ենք լինելու»:

Առավել մանրամասն՝ հարցազրույցում: