Արշավների ընթացքում հաճախ արշավականներն անսպասելիորեն բախվում են առողջությանը սպառնացող վտանգավոր իրավիճակների, սակայն իրազեկված լինելով հնարավոր է որոշակիորեն խուսափել դրանցից։

«Զանգեզուր» կենսոլորտային համալիր» ՊՈԱԿ-ը ներկայացրել է արշավների ընթացքում հաճախ ուղեկցող այս վտանգավոր բուսատեսակը՝ Կոծուկ/քեղ (լատ.՝ Heracleum)։ Այն նեխուրազգիների (հովանոցավորների) ընտանիքի բույս է։ Ցողունի բարձրությունը 1-2 մ է (երբեմն՝ 10-80 սմ)։ Տերևները խոշոր են, փետրաձև, երբեմն՝ պարզ։ Ծաղիկները սպիտակ են կամ դեղնականաչավուն՝ հավաքված բարդ հովանոցում։ Պտուղները ձվաձև են, կլորավուն։ Հայաստանում տարածված է գրեթե բոլոր մարզերում։

Ինչո՞վ է վտանգավոր այս բույսը

Հյութի մեջ պարունակում են նյութեր, որոնք, հայտնվելով մաշկի վրա, արևի ուլտրամանուշակագույն ճառագայթների հետ փոխազդեցության ներքո առաջացնում են 1-3-րդ աստիճանի այրվածքներ։ Այրվածքների տեղակայման և տարածվածության աստիճանից կախված ընդհուպ կարող են ստեղծել կյանքին սպառնացող իրավիճակ:

Մաշկի հետ շփման արդյունքում կարող են առաջացնել ալեգիկ սուր վիճակ։

Կոծուկից ստացված այրվածքների բուժումը բավականին երկարատև է, կախված այրվածքի աստիճանից կարող են թողնել խոր սպիեր։

Արշավականների հորդորում են՝

Արշավների ընթացքում, անկախ եղանակային պայմաններից, կրել վերջույթները ծածկող հագուստ և հնարավորինս խուսափել բույսի և բաց մաշկի շփումից։

Եթե Ձեր նախընտրած արահետի վրա անխուսափելի է կոծուկի(քեղի) հետ շփումը, խորհուրդ են տալիս օգտագործել արշավական ձեռնափայտերը՝ զգուշությամբ բույսի ցողունը դեմքից և մարմնից հեռացնելու նպատակով։

Ունանալ առաջին օգնության պարագաներ և անձնական դեղատուփ։