Քաղաքագետ Ստյոպա Սաֆարյանը գրում է.

Անցած 4 տարիներին ՀՀ ոչ բարով 2-րդ նախագահ Ռոբերտ Քոչարյանը 1 անգամ չէ, որ հայտարարել է, թե «44-օրյա պատերազմը սկսել է Հայաստանը», կամ «հայերը», վերջերս էլ՝ ՀՀ վարչապետ Նիկոլ Փաշինյանը։ Սա անգամ ստորություն համարելը քիչ է։ Սա ուղղակի ական է, որն անընդհատ մեր դեմ օգտագործվելու է, ինչպես մենք էին տասնամյակներով Խոջոլուի դեպքերի համար Մութալիբովի հայտարարությունն օգտագործում իրենց դեմ։ Ապագայում ադրբեջանցիները դեռ շատ են մեզ ու մեր սերունդներին հիշեցնելու այս երկոտանու հայտարարությունները՝ թե անգամ ձեր ղեկավարներից են պնդել, որ Հայաստանը «սադրել է խեղճ Ադրբեջանին», որոնք ցուցմունք են Հայաստանի, հայ ժողովրդի դեմ ու Արցախյան վերջին պատերազմում թեթևեցանելու են ալիևի պատասխանատվությունը ագրեսիոն պատերազմի համար։
Այսօր ՀՀ 3-րդ ոչ բարով նախագահ Սերժ Սարգսյանի կուսակցության՝ ՀՀԿ-ի երկրորդ դեմքը՝ փոխնախագահ Արմեն Աշոտյանն է հայտարարել, որ Արցախը հանձնել է ոչ թե Ռուսաստանը, այլ հայ ժողովուրդը։ Նա իր պնդման հիմնավորում է բերել այն «փաստարկը», թե հայ ժողովուրդը վարչապետի պաշտոնից չի հեռացրել «Արցախը հանձնած կամ հանձնելու մտադրություն ունեցող» Նիկոլ Փաշինյանին, հետևաբար, հայ ժողովուրդն էլ մեղսակից է արցախը հանձնելուն, իսկ Ռուսաստանը մեղք չունի․․․
Ու այս անբարոյական մտքերը դուրս են տրվում Արցախի խնդրի պատրվակով Հայաստանում իշխանությունը զավթած, արցախյան ծագումով 2 նախագահները կամ նրանց անմիջական շրջապատը, մեղադրելով այն ժողովրդին, ում խաբել են, թե իշխանության են գալիս Արցախի խնդիրը հայանպաստ լուծելու համար, բայց Հայաստանում իշխանությունը զավթելուց անմիջապես հետո արցախի սահմանադրությամբ արցախապատկան 7 շրջանները ճանաչել են Ադրբեջանի միջազգայնորեն ճանաչված տարածքի մաս, բանակցային բոլոր տարբերակներում համարել են վերադարձման ենթակա, իսկ «կղզյակի» վերածված նախկին ԼՂԻՄ տարածքի կարգավիճակի հարցն էլ նոր հանրաքվեի ճանապարհով վերապահել են Ալիևին՝ այդպիսով խոտանելով 1991թ․ ժողովրդական կամաարտահայտությունը անկախանալու հարցով։ Ու այս երկու վարչակազմերը, որի կարկառուն դեմքերը 1000-ապատիկ ու անծայրածիր հարաստացել են Հայաստանի ու նրա ժողովրդին հարստահարելու ճանապարհով, իսկ Ադրբեջանի հետ ռազմական-ռազմավարական բալանսում Հայաստանին թողել 100-ապատիկ թույլ և միայնակ, այժմ Արցախը հանձնելու մեջ մեղադրում են այն ժողովրդին, որի 10․000-ավոր որդիներ մեկնել են Արցախ զինվորական ծառայության, հազարները չեն վերադարձել, իսկ 2020թ․ տասնյակ հազարներով մոբիլիզացվել և գնացել են պատերազմ․․․ Զոհերի մեջ ոչ Ռոբերտ Քոչարյանի, ոչ Սերժ Սարգսյանի ընտանիքի անդամների, որդիների, փեսաների, եղբորորդիների կամ անմիջական հարազատների անուններ հայտնի չեն, բայց հայտնի են «Արցախը հանձնած» հայ ժողովրդի 4000 ընտանիքի որդիների անուններ․․․
Ու այս բոլոր հայտարարություններին տհաճորեն դեռ բախվելու են մեր զավակները ապագա ֆորումներում՝ երբ ադրբեջանցիների հետ հանդիպեն, ու նրանք մեր զավակների երեսով են տալու, որ ոչ Ռուսաստանը, ոչ Ադրբեջանը Արցախի հետ կատարվածում մեղք չունեն․ մեղքը հայ ժողովրդինն է, նրա ընտրած ղեկավարությանը, որը սադրել է պատերազմ, տվել զոհեր ու հրաժարվել Արցախից․․․
Ձեր ոտքը կոտրվեր հենց Հայաստան գալու օրը, որ այսօր այսքան անբարո մտքեր, Հայաստանի դեմ հայտարարություններ չգեներացվեր․․․