The Community հաղորդման հերթական զրուցակիցը դերասան Խաչատուր Հունանյանն էր։ StarNews-ը հետևեց զրույցին, որի ընթացքում դերասանը բաց ու անկեղծ խոսեց իր ծննդավայրի, մանկության, ԱՄՆ տեղափոխվելու և այնտեղ կարիերա ստեղծելու ճանապարհի մասին։ Զրույցը սակայն առավել խորքային ու հուզիչ դարձավ այն պահին, երբ անդրադարձ եղավ դերասանի առողջական վիճակին և քաղցկեղի դեմ իր պայքարին։
Վերջին ամիսներին համացանցում ակտիվորեն քննարկվում էր Խաչատուր Հունանյանի հիվանդության թեման, ինչի կապակցությամբ հաղորդավարի հարցին դերասանը մանրամասն ներկայացրեց իր բուժման ընթացքը։ Նրա խոսքով՝ մինչև Գերմանիա մեկնելը վիճակը բավականին ծանր էր․ քաղցկեղը ազդել էր ոսկրային համակարգի վրա, ինչի հետևանքով քայլելն ու շարժվելը զգալիորեն սահմանափակվել էին։ Սակայն Գերմանիայում ստացած բուժումը, ռադիացիաներն ու համապատասխան բժշկական միջամտությունները արդեն տվել են իրենց դրական արդյունքը։
Դերասանը նշեց, որ այժմ ինքնազգացողությունը օրեցօր բարելավվում է, թեև փետրվարին նրան սպասվում է հերթական ստուգումը՝ հասկանալու համար բուժման հաջորդ փուլերը։ Չնայած անցած դժվարություններին՝ Խաչատուր Հունանյանի խոսքից զգացվում էր անսասան հավատն ու հույսը։
Զրույցի կարևոր առանցքներից մեկը Խաչատուր Հունանյանի հոգեվիճակն ու տրամադրվածությունն էր։ Նրա խոսքով՝ ամենակարևոր գործոնը հիվանդության ընթացքի վրա մարդու մտածողությունն է։
«Քաղցկեղը մահապատիժ չի։ Դա վճիռ չի ոչ մեկի համար։ Քաղցկեղի բարդացման ամենամեծ պատճառը մարդու տրամադրվածությունն է այդ հիվանդության հանդեպ։ Գերմանիայում ես մի բան սովորեցի՝ դա կարելի է ընդունել գրիպի պես հիվանդություն, պարզապես չպետք է ներշնչել ինքդ քեզ, պետք է լավատես լինել»,- ասել է նա։
Խաչատուր Հունանյանի խոսքով՝ եթե մարդը ցանկանում է ապրել, հավատում է և չի հանձնվում, ապա հիվանդությունն աստիճանաբար նահանջում է։ Նա ընդգծեց ժպիտի, կյանքի փոքր ուրախությունների, մարդկանց հանդեպ բարության և դրական մտածողության կարևորությունը՝ նշելով, որ հենց այդ արժեքներն են օգնում հաղթահարել ամենաբարդ փորձությունները։