«Քաղաքացիական պայմանագիր» խմբակցության պատգամավոր Գագիկ Մելքոնյանի համոզմամբ՝ Ռոբերտ Քոչարյանի այն հայտարարությունները, թե Հայաստանն է հրահրել պատերազմը, ադրբեջանական կողմը խաղաքարտ է դարձնելու: Ըստ նրա՝ այսպիսով Քոչարյանը համագործակցում է Ադրբեջանի նախագահի հետ:

Մելքոնյանն այն տպավորությունն է ստանում, որ Ռ. Քոչարյանը ռուսական գործակալ է ՀՀ-ում՝ հիշեցնելով «Գույք՝ պարտքի դիմաց» քաղաքականությունը:

«Ռոբերտ Քոչարյանի մայրենի լեզուն ռուսերենն է, մտածում է ռուսերեն, բիզնեսները ՌԴ-ում են»,- ասում է նա:

Պատգամավորը նկատում է, որ երբ պատերազմի օրերին Քոչարյանը գնացել է ԼՂ, դրանից հետո լուրեր են տարածվել, թե հողերը ծախված են. «Բանակի քանդումը սկսվել է 2008 թվականի մարտի 1-ից հետո: Քառօրյա պատերազմից հետո ոչինչ չի արվել, սակայն գումար է դուրս գրվել»:

Անդրադառնալով ընդդիմության այն պնդումներին, թե Նոյեմբերի 9-ի հայտարարությամբ պետք է առաջնորդվել՝ Մելքոնյանն ասում է՝ Նոյեմբերի 9-ի հայտարարության 8 կետը չի կատարվել, սակայն պետք է 9-րդը կատարվի, ապա պատգամավորը հարց է հնչեցնում՝ ինչո՞ւ:

Մելքոնյանը ևս մեկ անգամ ասում է, որ ճանապարհները պետք է ապաշրջափակվեն, սակայն լինեն երկրների իրավազորության ներքո:

Խոսելով այն մասին, որ Ռուսաստանը օգնություն է ուղարկել ԼՂ տեղահանված բնակչությանը՝ վերջինս նկատում է. «Պատերազմի ժամանակ մտնում էին ղարաբաղցիների տները, ասում՝ դուրս եկեք, հիմա օգնություն են ուղարկում, հետողորմյա անում, ուզում են կրկին սարքեն իրենց գործիքը»:

Անդրադառնալով ՀՀ-ում կալանավորված ռուսաստանաբնակ Սամվել Կարապետյանին՝ Գագիկ Մելքոնյանը նշում է. «Ադրբեջանցիները իրենց բիզնեսների, միլիարդների վրա թքել են, գնացել կանգնել իրենց նախագահի կողքին, իսկ Սամվել Կարապետյանը թքում է մեր ու ՀԷՑ-ի վրա»:

Առավել մանրամասն՝ «Հայկական ժամանակ»-ի հետ հարցազրույցում: