Տաթև Ասատրյան. «Եթե ես բեմի փայլն եմ, ապա Նարեկն այն լույսն է, որն ստեղծում է այդ փայլը

Տաթև, Ձեր 4 մենահամերգները Հայաստանի ամենամեծ համերգասրահում՝ Երևանի Կարեն Դեմիրճյանի անվան մարզահամերգային համալիրում, մեծ իրադարձություն դարձան։ Հատկապես հաշվի առնելով, որ 4 համերգներն էլ անցան լեփ-լեցուն դահլիճում։ Ինչպե՞ս եք Ձեզ զգում նման պատասխանատվությունից հետո և ո՞վ է օգնում Ձեզ ստեղծել այդ կախարդանքը։

– Գիտեք, երբ հանդիսատեսը տեսնում է ինձ բեմում, նա տեսնում է միայն այսբերգի գագաթը։ Բայց իրականում այդ ամենի հետևում մի հսկայական թիմ է աշխատում՝ մարդիկ, ում ես համարում եմ իմ ընտանիքը։ Առանց նրանցից և ոչ մեկի՝ այս 4 համերգները չէին լինի այնպիսին, ինչպիսին եղան։ Մենք միասին ենք կերտում յուրաքանչյուր վայրկյանը։Տաթև, յուրաքանչյուր հաջողված արտիստի թիկունքում կանգնած է հզոր պրոդյուսեր։ Դուք և Նարեկ Ստամբոլցյանը միասին անցել եք երկար ճանապարհ և ամեն ինչ սկսել եք զրոյից։ Ինչպիսի՞ն է նրա դերը Ձեր կյանքում և հատկապես համերգի ընթացքում, երբ ամեն վայրկյանը վճռորոշ է։

– Գիտեք, Նարեկի մասին խոսելիս միայն «պրոդյուսեր» բառը շատ քիչ է։ Նա իմ հաջողության հիմքն է, իմ ուժն ու այն գլխավոր հենասյունը, որի վրա կառուցված է իմ ողջ գործունեությունը։ Մենք իրոք ամեն ինչ սկսել ենք զրոյից՝ զինված միայն երազանքով ու միմյանց հանդեպ անսահման հավատով։ Այն, ինչ այսօր տեսնում է հանդիսատեսը, Նարեկի անքուն գիշերների, նրա կրեատիվ մտքերի և յուրահատուկ տեսլականի արդյունքն է։ Նա է գեներացնում այն բոլոր գաղափարները, որոնք իմ համերգային ծրագրերը դարձնում են տարբերվող ու բացառիկ։Բայց ամենակարևորն ու հուզիչը սկսվում է այն պահին, երբ ես բարձրանում եմ բեմ։ Համերգի ժամանակ Նարեկն իմ ամենավստահելի ուղեցույցն է, իմ «աչքերն ու ականջները» դահլիճում։ Նա մշտապես հետևում է հանդիսատեսի արձագանքին և ինձ հուշումներ տալիս՝ դահլիճի որ հատվածին ուշադրություն դարձնեմ, որ կողմում է էներգետիկան ավելի շատ պետք

Իմ համերգային իմպրովիզների մեծ մասի հեղինակը հենց Նարեկն է։ Նա բացառիկ բնազդ ունի. տեղում զգում է, թե ինչ է պետք հանդիսատեսին հենց այդ վայրկյանին։ Նա կարողանում է նախապես գրված ծրագիրը վայրկենապես վերաձևել՝ փոխելով երգերի հերթականությունը կամ տեմպը, որպեսզի շոուի էմոցիոնալ գիծը լինի կատարյալ։

Նարեկն այն մարդն է, որն ինձ սովորեցրեց երբեք չհանձնվել։ Նրա սերն ու պրոֆեսիոնալիզմը միահյուսված են, և հենց այդ տանդեմն է ստեղծում այն կախարդանքը, որը մենք նվիրում ենք մեր հանդիսատեսին։ Ես միշտ ասում եմ՝ եթե ես բեմի փայլն եմ, ապա Նարեկն այն լույսն է, որն ստեղծում է այդ փայլը։

Բացի կազմակերպչական մասից, Ձեր շոուները վիզուալ առումով շատ բարձր մակարդակի վրա են։ Ինչպե՞ս է ստացվում այդ պատկերը։

– Դրա համար ես պարտական եմ ռեժիսոր Արեն Բայադյանին և լուսային ձևավորող Դավիթ Ռուբինյանին։ Արենը պարզապես ռեժիսոր չէ, նա կարողանում է իմ երաժշտությունը տեսանելի դարձնել։ Նա է կանգնած իմ երևանյան բոլոր 5 հաջողված համերգների թիկունքում։ Իսկ Դավիթը՝ Արենի «աջ ձեռքը», լույսով «նկարում է» յուրաքանչյուր երգի հուզմունքը։ Նրանք միասին ստեղծում են այն վիզուալ հեքիաթը, որի մեջ ես ինձ զգում եմ լիարժեք ու պաշտպանված։

Տաթև, Ձեր համերգների ժամանակ հանդիսատեսը հաճախ նշում է, որ ձայնն այնքան մաքուր ու թափանցիկ է, որ թվում է՝ երգչուհին շնչում է հենց իրենց կողքին։ Ո՞վ է պատասխանատու այդ կատարյալ հնչողության համար։

– Գիտեք, ձայնը համերգի հոգին է։ Եթե ձայնը լավը չեղավ, նույնիսկ ամենաշքեղ շոուն կարող է ձախողվել։ Այդ պատճառով ես հանգիստ եմ ու վստահ, քանի որ դահլիճում հնչող յուրաքանչյուր նոտայի համար պատասխանատու է Արման Ավետիսյանը։

Արմանը պարզապես ձայնային ռեժիսոր չէ, նա Հայաստանի լավագույն մասնագետներից է, որը տիրապետում է ձայնի նրբություններին այնպես, ինչպես ոչ ոք։ Նա իմ թիմի անբաժանելի մասն է և ինձ հետ եղել է իմ կարևորագույն բեմերում։

Կա մի մարդ, ում հանդիսատեսը չի տեսնում։ Նրանից է կախված իմ ամբողջ ինքնազգացողությունը բեմում։ Դա Մելսիկ Գասպարյանն է՝ մեր Մելսը։ Նրա հետ ես համագործակցում եմ իմ կարիերայի հենց սկզբից։ Արդեն 10 տարի է Մելսը իմ բոլոր երգերի երաժշտական ձևավորման հեղինակն է (mix mastering): Նա այն մարդն է, որն ապահովում է իմ ականջներում հնչող (in-ear monitors) երաժշտական գործիքների ճիշտ դասավորվածությունը։

Նա գիտի իմ ձայնի ամեն մի նրբությունը, գիտի՝ որ պահին որ գործիքն է ինձ պետք ավելի բարձր լսել, որպեսզի ես ինձ վստահ զգամ։

Մելսի եղբայրը՝ Գուրգեն Գասպարյանը՝ մեր բոլորի սիրելի Գուրոն, իմ երաժշտական խմբի ղեկավարն է և գլխավոր ստեղնաշարահարը։ Բայց նրա դերը շատ ավելի մեծ է. Գուրգենն իմ գրեթե բոլոր հիթերի գործիքավորողն է, իսկ մի քանիսի դեպքում՝ նաև երաժշտության հեղինակը։Համերգի ժամանակ Գուրոն այն առանցքն է, որի շուրջը պրոֆեսիոնալ առումով դասավորվում են մյուս բոլոր երաժիշտները։ Նա է պատասխանատու համերգի երաժշտական ողջ ընթացքի համար։ Եթե ուշադիր լինեք, բեմում բոլոր հայացքները նրան են ուղղված։

Իսկ ովքե՞ր են լրացնում այդ երաժշտական կորիզը։

– Գուրգենի կողքին են կիթառահար Կևորկ Դիրսարկիսիանը, քանոնահար Հայարփի Ապինյանը, թմբուկահար Քրիստինե Հովսեփյան, Արմեն Սարգսյանը, որին մենք բոլորս ճանաչում ենք որպես Բրդե։ Նա մեր երկրորդ ստեղնաշարահարն է։

Նրա դերը հսկայական է երաժշտական շերտերը հարստացնելու հարցում։ Հովսեփ Եգանյանը մեր հարվածային գործիքների վարպետն է։ Նա համերգի զարկերակն է, նրա ռիթմից է կախված ամբողջ դահլիճի էներգետիկան։

Այս մարդիկ են իմ ուժը։ Երբ ես բեմ եմ դուրս գալիս, ես գիտեմ, որ իմ թիկունքում պրոֆեսիոնալների մի հսկա բանակ է, որոնք սիրում են իրենց գործն այնպես, ինչպես ես։

https://style.news.am/arm/news/111978/tatev-asatryan-ete-es-bemi-payln-em-apa-narekn-ayn-luysn-e-orn-stextsum-e-ayd-payly.html?fbclid=IwVERTSAPfJwhleHRuA2FlbQIxMABzcnRjBmFwcF9pZAwzNTA2ODU1MzE3MjgAAR5QgpttmCRHittMLHRZ1_l6NhYowK3MqrAt1Lw48qb9pj_54mwDD6Iu_L7LnQ_aem_HUFWZSTioYuUNdkWYPWzWQ

Իսկ ովքե՞ր են լրացնում այդ երաժշտական կորիզը։

#Տաթև #Ասատրյան #Եթե #ես #բեմի #փայլն #եմ #ապա #Նարեկն #այն #լույսն #որն #ստեղծում #այդ #փայլը