Մեջքի ցավը կարող է հուշել ձվարանների քաղցկեղի մասին. Daily Mail

med.news.am-ը գրում է. Ոտքերի այտուցվելը, մեջքի ցավը, անհարմարությունը սեքսի ժամանակ, հոգնածությունը, աղիների աշխատանքի փոփոխությունը եւ մինստրուալ ցիկլի խանգարումները ձվարանների քաղցկեղի նշաններ են, որոնք հաճախ անտեսվում են։ Այս մասին Daily Mail պարբերականին պատմել է բրիտանացի ընտանեկան բժիշկ Ալեքս Միսիքը։

Մասնագետի խոսքով՝ ձվարանների քաղցկեղը վաղ փուլում դժվար է ախտորոշել, քանի որ ախտանշանները հեշտությամբ շփոթվում են ոչ այնքան լուրջ խնդիրների հետ։ Որպես կանոն, կանայք ուշադրություն են դարձնում հայտնի նշաններին, ինչպիսիք են որովայնի փքվածությունը կամ այտուցը, ցավն ու անհանգստությունը կոնքի հատվածում, արագ կշտանալը եւ հաճախակի միզելը:

Սակայն ոչ ակնհայտ ախտանիշները, ինչպիսիք են դաշտանային ցիկլի փոփոխությունները եւ անհանգստությունը սեռական հարաբերության ժամանակ, հաճախ կապված են դաշտանադադարի եւ այլ հորմոնալ փոփոխությունների հետ: Մշտական ​​հոգնածությունն ու մարսողական խնդիրները նույնպես հաճախ անտեսվում են. դրանց առկայությունը հաճախ վերագրվում է վատ սնվելուն եւ սթրեսին:

Դոկտոր Միսիքն ավելացրել է, որ ձվարանների քաղցկեղի հետագա փուլերին ուղեկցող ախտանիշ կարող է լինել ոտքերի այտուցը: Երբ ուռուցքը սեղմում է երակային ուղիները, դա հանգեցնում է հեմոդինամիկայի հետ կապված խնդիրների՝ անոթներով արյան շարժմանը: Այդ հիվանդությունն ունեցող կանայք կարող են նաեւ մեջքի ցավ զգալ կոնքի հատվածում կուտակված հեղուկի կամ հյուսվածքի վրա սեղմող ուռուցքի պատճառով: